أغاني الأفراح في الريف المصري

"خلاصة القانون".. وعقوبة الابتزاز الالكتروني

النهاردة حلقتنا بتهم كل واحد فينا، لأن مفيش حد دلوقتى مبيستخدمش واتساب أو إيميل، وللأسف المشاكل فيهم كترت.

النهاردة حلقتنا مش مجرد كلام، دي رسالة لكل واحد فاكر إنه ورا شاشة الموبايل يقدر يكسر حد، أو يهدد بنت بصورة، أو يبتز راجل بكلمة..


لو حد شتمك على الواتساب، أو نصب عليك في قرشين، أو بعتلك إيميل تهديد.. هل حقك ضاع؟ هل 'سكرين شوت' كفاية عشان تحبسه؟ النهاردة هنعرف إزاي تخلي (رسالة) تبقى (حبل مشنقة) للمجرم، وإزاي تثبت حقك في محضر الشرطة بالطريقة الصح ع . ركز معايا يا صاحب الحق!"

السكرين شوت "مش دليل قاطع"

أول غلطة بنقع فيها كلنا هي إننا بنفتكر إن السكرين شوت (Screen Shot) هي الدليل النهائي. أحب أصدمك وأقولك إن السكرين شوت عند القاضي 'قرينة' مش 'دليل قاطع'.. ليه؟ عشان الفوتوشوب والبرامج مخلتش حاجة، وأي حد ممكن يضرب محادثة في دقيقتين.

أومال أعمل إيه؟ القانون المصري (قانون مكافحة جرائم تقنية المعلومات رقم 175 لسنة 2018) حط شروط عشان الدليل الإلكتروني يبقى معتمد."

(تروح فين وتعمل إيه؟)

لو حصلتلك مشكلة، متجريش على قسم الشرطة العادي اللي جنب بيتكم.. لا، ركز في الخطوات دي:

1. المكان الصح: تطلع على إدارة مكافحة جرائم الحاسبات وشبكات المعلومات (مقرها في وزارة الداخلية - التجمع الخامس) أو مكاتبها في مديريات الأمن بالمحافظات.

2. الاتصال على الخط الساخن 108 ده مخصص لجرائم الإنترنت لو عايز تستفسر).

3. ماتمسحش حاجة: أوعى تمسح الرسالة أو تعمل "Block" للشخص قبل ما تروح. سيب المحادثة زي ما هي على موبايلك.

4. الفحص الفني: هناك فيه مهندسين متخصصين، بياخدوا الموبايل منك، بيفحصوا الرسالة، وبيطلعوا حاجة اسمها (الرقم التعريفي - Header) للإيميل، أو بيأكدوا إن الرسالة طالعة من السيرفر الفلاني للموبايل الفلاني."

نصائح قبل ما تعمل المحضر

"قبل ما تروح تعمل المحضر، خد بالك من شوية تكات:
ميعاد المحضر: لازم تعمل المحضر خلال 3 شهور من وقت ما شوفت الرسالة أو عرفت بالواقعة (عشان ده حق الشكوى).
خد موبايلك معاك: واللاب توب لو الموضوع إيميل.
البطاقة الشخصية: لازم تكون معاك طبعاً".

شروط قبول الدليل في المحضر

عشان المحضر بتاعك يبقى 'حديد'، المهندس الفني لازم يتأكد من 3 حاجات:
سلامة الدليل: إن الرسالة محصلش فيها تلاعب أو تعديل.
الاتصال: إنها جاية من حساب المتهم فعلاً (برقم تليفونه أو إيميله).
القدرة على الوصول: إن الدليل ده متاح وموجود وسهل قراءته."

لو الرسالة اتمسحت من عندك، الموضوع بيبقى أصعب بكتير، بس مش مستحيل لو لسه موجودة على سيرفرات تانية.. بس الأضمن، سيبها مكانها!"

إيه هي العقوبة؟

· المادة 327 من قانون العقوبات: بتقولك لو بتهدد حد بكتابة (رسالة، إيميل، واتساب) إنك ترتكب جريمة ضده أو ضد ماله، أو تفشي أسرار تخدش شرفه.. العقوبة بتوصل لـ السجن لمدة تصل 3 سنين.

· ولو التهديد شفوي؟ (يعني مكالمة أو مقابلة): العقوبة ممكن توصل لـ الحبس سنتين وغرامة مالية.

· قانون 'جرائم تكنولوجيا المعلومات' (القانون 175 لسنة 2018): وده بقى اللي 'بيكهرب' المبتزين بجد.. لو انتهكت حرمة الحياة الخاصة، أو بعت رسائل فيها إزعاج، أو ركبت صور (فوتوشوب) عشان تشهر بحد.. العقوبة فيها حبس مدة لا تقل عن 6 شهور وغرامات بتوصل لـ 100 ألف و300 ألف جنيه!"

· "تلاقي الواحد من دول يبتز ويشتم ويهدد، ولما يتمسك يقول 'كنت بهزر' أو 'كنت بربيها'.. يا حبيبي القانون مفيش فيه هزار. 

مجرد إنك تبعت رسالة فيها تهديد، دي جريمة كاملة الأركان. ولو الابتزاز ده غرضه إنك تاخد 'فلوس' أو 'منفعة'، هنا العقوبة بتشد أكتر وممكن توصل لـ الأشغال الشاقة في حالات معينة لو كان التهديد بالقتل!"

"في نهاية حلقتنا، عايز أقول لكل بنت ولكل شاب بيتعرض لابتزاز: 'متخافش'.. القانون في ضهرك، والتكنولوجيا اللي المجرم بيستخدمها عشان يداري وشه، هي هي اللي هتجيبه ، وبلغ فوراً.

"في الآخر يا جماعة، التطور اللي إحنا فيه خلى الجريمة سهلة، بس خلى كشفها كمان متاح. متسكتش عن حقك، والقانون والشرطة لديها القدرة على رجوع حقك ، بس المهم تمشي الإجراءات صح من الأول.

.. نشوفكم الحلقة الجاية، وخلي موبايلاتكم دايماً في أمان!"

رمضان عبد المقصود