أغاني الأفراح في الريف المصري

أهلاً بكم في رحلة إيمانية قصيرة، نتأمل فيها مع صانع المحتوى رمضان عبد المقصود واحدة من أعظم النعم التي تحيط بنا ولا نشعر بها.. نعمة "الستر".

"مستورة.. لإن ربنا كريم"

عارفين إيه أكتر نعمة إحنا غرقانين فيها ومش واخدين بالنا؟ هي نعمة الستر.

إحنا عايشين بستر ربنا، مش بشطارتنا ولا بجمالنا. الستر ده عامل زي التوب اللي ربنا لَبّسهولنا عشان يداري بيه عيوبنا، وتقصيرنا، وحتى الأفكار اللي بتيجي في بالنا ومحدش يعرفها غيره.

· الستر مش بس إن مفيش حد عارف أخطاءك، الستر ده "غطا" من عند ربنا بيخلي شكلك حلو قدام الناس، رغم إنك بينك وبين نفسك عارف إنك مش مثالي.

· لو كشفها الله عنا لافتضحنا ولعمت العداوة والبغضاء بين الناس.

إيه هو الستر؟

· الستر مش بس إن محدش يعرف غلطك.. لا وكمان تلاقي ربنا مطلعش سرك؟

· دي فرصة. ربنا بيسترك عشان ترجع، مش عشان تتمادى.

· في رمضان، الستر بياخد شكل تاني.. ربنا بيستر تقصيرنا في العبادة، ويقبل مننا القليل، ويظهره قدام الناس كأنه جبل حسنات.

"الستر مش سجن"

يا شباب، السوشيال ميديا خلتنا "مكشوفين" زيادة عن اللزوم. تلاقي الواحد فينا يغلط، وبدل ما يستغفر ويداري، يروح يصور الغلط ده وينزله "ستوري"!
نصيحة: لو ربنا سترك في لحظة ضعف، متفضحش نفسك أنت. الستر فرصة تانية عشان ترجع، مش علشان تتمادى.
وحذر النبي ﷺ من المجاهرين، وهم الذين يسترهم الله، فيكشفون ستره، قائلاً: (كل أمتي معافى إلا المجاهرين).
الستر في العلاقات: لما تخرج من تجربة أو علاقة، او خصام بينك وبين احد، خليك شهم واستُر اللي كان بينكم. الرجولة والجدعنة بتبان في "الستر عند الخصومة".

رسالة للكبار: "ارحموا تُرحموا"

· أصحاب الخبرة.. الستر معناه إنكم متكونوش "قضاة" على حياة الناس.
لو شفت حد بيغلط، بدل ما تفضحه أو تتكلم عليه في قعدة، استره وانصحه بالراحة.
افتكروا دايماً إن "من ستر مسلماً ستره الله في الدنيا والآخرة".
إحنا بنكبر عشان نلم جرح بعض، مش عشان نكشف عيوب بعض.

الستر في القرآن الكريم

ومن رحمته إنه بيغطي عيوبنا بجميله. في القرآن الكريم،

ربنا بيحسسنا إن الستر ده "لباس" بيحمي روحنا قبل جسمنا، زي ما قال في سورة الأعراف:

"يَا بَنِي آدَمَ قَدْ أَنزَلْنَا عَلَيْكُمْ لِبَاسًا يُوَارِي سَوْآتِكُمْ وَرِيشًا ۖ وَلِبَاسُ التَّقْوَىٰ ذَٰلِكَ خَيْرٌ"


· وحذر النبي ﷺ من تتبع العورات قائلاً: ((ومن تَتَبَّع الله عورته فضحه ولو في جوف بيته)).

أما سيدنا النبي ﷺ، فكان دايمًا يعلمنا إن اللي بيستر الناس، ربنا بيجازيه من نفس العمل. قال لنا في الحديث الشريف: (وَمَنْ سَتَرَ مُسْلِمًا سَتَرَهُ اللَّهُ يَوْمَ الْقِيَامَةِ) 

· يعني لو شفت عيب في حد وغطيت عليه وما فضحتوش، ربنا بيشيلك الستر ده ليوم إنت هتكون أحوج ما يكون فيه لرحمته. وحتى في أذكار الصباح والمساء، كان النبي ﷺ بيدعي ويقول: "اللَّهُمَّ اسْتُرْ عَوْرَاتِي وَآمنْ رَوْعَاتِي".

يُروى عن سيدنا /علي بن أبي طالب رضي الله عنه: قال "لو رأيت الفضيحة بأم عيني لسترتها بردائي، فإن مذيع الفاحشة كفاعلها".

وكمان سيدنا أبي بكر الصديق رضي الله عنه قال: " لو لم أجد للسارق والزاني وشارب الخمر إلاَّ ثوبي لأحببتُ أن أستره بِه ". إذا وصلتك فضيحةٌ لأحد فاجعلها تقف عندك ولا تتعدّاك، فإن وقفت عندك أخذتَ أجر الستر، ومن ستر مسلماً ستره الله!

ومن محبته للستر:أنه لم يجعل للمعاصي صوتا يظهر معها، أو رائحة تفضح أصحابها، ولم يجعل للمذنبين علامة ظاهرة يراها كل الناس؛ ليخافوا الفضيحة فيمتنعوا عنها.

لسانُك لا تذكرْ به عورةَ امرئٍ ...

فكلُّك عوراتٌ وللنَّاسِ ألسنُ

وعينُك إن أبدتْ إليك معايبًا ...

لقومٍ فقلْ: يا عينُ للنَّاسِ أعينُ

الستر في الجامعة

· لو شفت زميلك سقط أو جاب درجة وحشة: مش لازم تبقى "المذيع" وتبلغ الزملاء. الستر هنا إنك تطبطب عليه وتقوله "حصل خير ولعلها خيرة

نيجي للستر في الشغل (عشان لقمة العيش طاهرة)

· مكان أكل العيش محتاج ستر أكتر من أي مكان تاني، لإن الغلطة فيه بتبقى بخراب بيوت.

· لو زميلك غلط غلطة في السيستم أو "عك": لو تقدر تصلحها من سكات، اعمل كده. الستر إنك تروح تنبهه بينك وبينه، مش تروح لـ "المدير" عشان تبان إنك الأشطر.

· أسرار الشغل وزملاؤك: البيوت أسرار، والمكاتب كمان أسرار. بلاش نقل الكلام اللي بيتقال في "ساعة فضفضة" في البريك

نيجي بقه للستر في الشارع (عشان نفضل ماشيين ببركة ربنا)

· الشارع ده "كتاب مفتوح"، وكلنا معرضين فيه لمواقف غريبة.

· الحوادث والخناقات: بلاش حركة إننا نطلع الموبايلات ونصوّر الناس وهي في أضعف حالاتها. الستر إنك تمد إيدك تساعد، أو تمشي وتدعي ليهم بظهر الغيب.

· لو شفت حد لابس حاجة مش مظبوطة أو حصل له موقف محرج: بدل ما تضحك أو تتنمر، حاول تنبهه بالراحة وبصوت واطي جداً "وتقوله، خد بالك في كذا". الكلمة دي بتبقى بمليون جنيه عند الشخص وقتها.

قانون الستر

عايز ربنا يديم عليك الستر؟ الموضوع بسيط خالص: "استُر.. تُستَر".

1. استُر غيرك: بلاش تشير فيديوهات فضايح أو تتكلم على حد. ولو جاتلك رسالة فيها فضيحة لحد، خليها تقف عندك وتموت.

2. استُر نفسك: متبقاش "مجاهر". ذنوب الخلوات دي بينك وبين رب كريم، خليها في السر وحاول تصلحها.

3. اشكر ربنا: كل يوم الصبح قول "اللهم إني أسألك الستر في الدنيا والآخرة".

· إحنا داخلين على رمضان، والناس كلها ماشية في الشوارع منورة، اللي بيصلي واللي بيوزع تمر، واللي صوته في التراويح يجنن.. بس لو فكرت لحظة، هتلاقي إن كلنا ماشيين بـ 'الستر'. لولا إن ربنا ساتر اللي جوانا، كان زماننا مكسوفين نبص في وش بعض."

· استروا على بعض، وحبوا بعض، وخليكم فاكرين.. لولا الستر، لضاقت بالكل السبل."

· رمضانكم مستور ومجبور الخاطر.

يا رب اجعلنا دايماً مستورين فوق الأرض، وتحت الأرض، ويوم العرض عليك. وكل عام وانت بخير/ والسلام.

ختاماً.. الستر في رمضان

وإحنا داخلين على شهر رمضان، بنشوف الناس كلها منورة في الشوارع، بس لو فكرنا لحظة، هنلاقي إن كلنا ماشيين بـ "الستر". لولا إن ربنا ساتر اللي جوانا، كان زماننا مكسوفين نبص في وش بعض.

كان معكم في هذه الخواطر رمضان عبد المقصود، داعياً الله لنا ولكم: "يا رب اجعلنا دايماً مستورين فوق الأرض، وتحت الأرض، ويوم العرض عليك".

رمضانكم مستور ومجبور الخاطر.. وكل عام وأنتم بخير.